كندة علوش تكشف سر زيادة وزنها 20 كيلو

كشفت الفنانة كندة علوش عن كواليس تغير شكلها وخسارتها للوزن بعد انتهاء تصوير مسلسلها الأخير، مؤكدة أنها كانت زائدة أكثر من 20 كيلو خلال التصوير.

وقالت كندة في تصريحات تليفزيونية: "إحنا انتهينا تصوير المسلسل ده من أكتر من سنة، كان هيتعرض قبل رمضان اللي فات بس ميعاد عرضه اتأجل، وكنت في المسلسل ده زايدة أكتر من 20 كيلو، كنت فوق الـ80، ولما بقعد أتفرج مع عمرو والله بقوله هي منين جت الثقة دي اللي تخليني أنزل أصور وأنا بالحجم ده".

وأضافت ضاحكة: "عمرو كان يقولي لأ حلو شكلك لايق على الكاركتر، والحمد لله من حسن حظي إن الناس مكانش ليهم كومنتات سلبية، في العادي ده اللي بيحصل، لكن أنا مبسوطة إنه مجاش ليا ولا كومنت واحد مش حلو".

وتابعت: "حد قالي لو حد قال حاجة قولي إنك تخنتي عشان الدور، قولت لأ أنا مش هقول كده أنا كنت مليانة عادي، بس بعد المسلسل قولت لازم أغير من شكلي وبدأت دايت وتمرين".

وعن دعم زوجها عمرو يوسف لها في رحلة إنقاص الوزن، قالت مازحة: "عمرو كان أول ما يعرف إني عاملة دايت يروح يطلب بيتزا ومكرونة بالبشاميل".